Mei Spitznama isch Eile ond somit au mei Usernam

Des Eile hot aber au bsondere Bedeutong, weil des net die Eile isch, sondern a klois Oi, also a Eile.

Da I scho a elters Semeschter ben ond des scho vor fascht sechzg Johr sei Lauf gnomma hot, will I des hiermit au verzehla:

Als jongs Maedle ben I noch Schwaebisch Gmuend komma, weil es bei ons dahoim koi Arbad geba hot, hot mir mei Tande dazua verholfa.
Da I aus ra Wirtschaft em Altkrois Horb am Neckr komm, hot ma mir au en ra Wirtschaft a Gschaeft gsuacht.

En der Wirtschaft do war dia Wirte domols scho a weng neba dr Kapp. Des hend so a baar Lausbuaba, eigentlich wars dr Schwemmverei vo Gmuend, dia hend dia Wirte gaergert. No hod dia en ihrem Zora am ma Gascht (der vom Schwemmverei) a Oschteroi an da Kopf schmeissa wella. Sell Oi war aber net gnuag hartxotta ond des Oi isch an ra Wandverdaefelong nodergloffa. No hab I en meim Dialkt gsagt: Ha guggad au mol des Eile a.
De ganz Meute hod no gschriea: Jo guggad au mol des Eile a.

Seitdem ben I bei meine Bekannte halt s'Eile.
So isch des jetztad au em Usenet.

Em Internet ben I scho seit 1990

Au beweg I mi gern en verschiedene news-Gruppa. Am liebschta bei de Schwobaleit alt.aeffle.und.pferdle

Des Aellas hab I aber onserm Jonga, am Framstag, zom verdanka.
An Ma han I au no, des isch dr Kopf dr Familie.
Streit hend mir koin mitnander, wenn Er des duad was I will!

Radfahra isch au a bsondere Leidaschaft vo mir

Mir wohnad zwar an dr Ostalb, aber ma ka sich oinaweg Radweg aussuacha dia net grad so schteil send.
I fahr so em Schnitt femfdausad Kilometer em Johr.
I hab zwoi Fahrraeder. Ois zom Eikaufa ond dann no a Faltrad, mo I gern nemm, wenn I ieberland fahr.

A Ih-Baik brauch I no net, I will mi doch bewega ond net fahra lassa :-)

Enzwischa ben I femfasiebzg. S'gfuehlte Alter isch isch des aber net :-)